| Working hours | |
|
|
| 09:30 – 17:30 | |
- Home
- News
News
«ՎԱՀԱՆ ԹԷՔԷԵԱՆ. ՅՕԴՈՒԱԾՆԵՐԻ ԺՈՂՈՎԱԾՈՒ» ԵՌԱՀԱՏՈՐԻ ԱՌԱՋԻՆ ԳՐՔԻ ՇՆՈՐՀԱՆԴԵՍԸ
2022թ. մայիսի 6-ին Երևանի «Թեքեյան կենտրոն»-ում տեղի ունեցավ Հյուսիսային համալսարանի դասախոս, բանասիրական գիտությունների թեկնածու, դոցենտ Վարդուհի Դավթյանի կողմից կազմված «Վահան Թէքէեան. Յօդուածների ժողովածու» եռահատոր հրատակության առաջին գրքի շնորհանդեսը: Հայ ընթերցողին հատնի են Վ. Թեքեյանի բանաստեղծությունները, սակայն հոդվածները, որոնք առանձին գրքով ընթերցողին ներկայացվում են առաջին անգամ: Գիրքը տպագրվել է «Թեքեյան կենտրոն» հիմնադրամի աջակցությամբ և առաջին անգամ ներկայացնում է հանճարեղ գրողի 1901-1910թթ գրած և արևմտահայ և արտասահմանյան մամուլի էջերում տպագրած հոդվածները: Կազմող հեղինակը մեծ ջանադրությամբ, գիտական բարձր մակարդակով հավաքել և ժամանակագրական կարգով ներկայացրել է «ոսկու ձուլակտորների պես մամուլում սփռված» հոդվածները:
Բացման խոսքով հանդես եկավ «Թեքեյան կենտրոն» հիմնադրամի տնօրեն Արմեն Ծուլիկյանը: Շնորհավորելով հեղինակին գրքի հրատարակության առիթով՝ նա ուրախությամբ նկատեց, որ հատորի լույսընծայումը մշակութասեր հայության կողմից սպասված ինքնատիպ աշխատանք է: Ճիշտ է, ըստ նրա, Վահան Թեքեյանին Հայաստանում նոր-նոր են խորությամբ սկսում ճանաչել, սակայն Սփյուռքում նա վաղուց է գնահատված ու սիրված: Լինելով արևմտահայ վերջին և սփյուռքահայ առաջին պոետը՝ նա միաժամանակ ծավալել է հասարակական մեծ գործունեություն: Ժողովածուում ընդգրկված հոդվածների շնորհիվ ընթերցողն առավել մանրամասն կծանոթանա կարողագույն հրապարակագրի ազգային, մշակութային և հասարակական գործունեությանը:
Ապա տպավորիչ ելույթով հանդես եկավ գրքի հեղինակը՝ ներկայացնելով հանճարեղ գրողի հրապարակագրության առանձնահատկությունները:
Գրքի վերաբերյալ ծավալուն և ուշագրավ վերլուծությամբ հանդես եկավ Մանուկ Աբեղյանի անվան գրականության ինստիտուտի ավագ գիտաշխատող, բանասիրական գիտությունների թեկնածու, դոցենտ Նունե Մկրտչյանը: Նա, բարձր գնահատելով Վ. Դավթյանի կատարած աշխատանքը, մասնավոր ուշադրություն դարձրեց առաջաբանին՝ «Հազարներու մէջէն մէկը» վերնագրով, Ծանոթագրություններին՝ մանրակրկիտ աշխատված, Անձնանունների և Տեղանունների ցանկին՝ կազմված գիտական բարձր մակարդակով, ինչը միաժամանակ երևան էր հանում կազմողի հարուստ գիտելիքները խնդրո առարկա նյութի վերաբերյալ: Ըստ բանախոսի, գիրքը հարուստ նյութ կհաղորդի ընթերցողին՝ հասկանալու ժամանակաշրջանն ու միջավայրը:
Ուշագրավ էր բանախոս ԵՊՀ դասախոս, բանասիրական գիտությունների թեկնածու Նարինե Մարկոսյանի ելույթը: Բարձր գնահատելով հեղինակի աշխատանքը՝ նա կարևորեց հոդվածների բազմաթեմայնությունը՝ գրականություն, քաղաքականություն, կրոն, մշակույթ, որբահավաքություն, կրթություն, լրագրություն, գրատպություն և այլն, որոնք կարող են տալ ուսումնասիրության անսպառ նյութ:
Բանախոս Երևանի Հյուսիսային համալսարանի Բանասիրության և մանակավարժության ֆակուլտետի դեկան Մերի Այվազյանն էլ իր խոսքում նկատեց, որ Վ. Թեքեյանի հոդվածները ճանաչողության լայն հնարավորություն են տալիս. ընթերցողը կարող է ճանաչել մշակութային, քաղաքական, հոգևոր գործիչների, ծանոթանալ նրանց կյանքի և գործունեության մանրամասներին, որոնց մասին հանրամատչելի տեղեկությունները այլ աղբյուրներում կա՛մ քիչ են, կա՛մ բացակայում են:
Շնորհանդեսի գեղարվեստական մասում հնչեցին Կոմիտասի անզուգական մշակումները ջութակահար Գրիգոր Գուլխանջյանի հրաշալի կատարմամբ:
Անկրկնելի ելույթով հանդես եկավ ասմունքող Աիդա Ասատուրյանը, որը ներկայացրեց հատվածներ Վ. Թեքեյանի հոդվածներից:
Միջոցառումը հուզառատ էր, տպավորիչ և ջերմ: Թեքեյանասերները խոստովանեցին, որ անհամբեր կսպասեն գրքի երկրորդ և երրորդ հատորների լույսընծայմանը:
Լրատվության և հասարակայնության հետ կապերի ուսումնապրակտիկ կենտրոն
Հյուսիսային համալսարանի ռեկտոր Մհեր Մակիչյանի շնորհավորական ուղերձը Շուշիի տեխնոլոգիական համալսարանի ռեկտորին տարեդարձի կապակցությամբ
Հարգելի պարոն Միքայելյան,
Հյուսիսային համալսարանի աշխատակազմը և անձամբ ես ջերմորեն շնոհավորում ենք Ձեզ ծննդյան տարեդարձի կապակցությամբ: Համոզված ենք, որ Շուշիի տեխնոլոգիական համալսարանի ռեկտորի պաշտոնում Ձեր գործունեությամբ մեծ ներդրում ունեք մեր հայրենակիցների կրթության և գիտության կազմակերպման պատասխանատու գործում: Օգտվելով առիթից՝ ցանկանում ենք նաև վերահաստատել մեր պատրաստակամությունը էլ ավելի խորացնելու Հյուսիսային համալսարանի և Շուշիի տեխնոլոգիական համալսարանի միջև ձևավորված գործընկերային հարաբերությունները:
Կրկին շնորհավորելով Ձեզ տարեդարձի առթիվ՝ մաղթում ենք առողջություն, ուժ և կորով՝ Ձեր հայրենանվեր գործում:
Լրատվության և հասարակայնության հետ կապերի ուսումնապրակտիկ կենտրոն
Տեղի ունեցավ Հյուսիսային համալսարանի
Ուսանողական գիտական ընկերության հերթական նիստը
2022թ. ապրիլի 29-ին տեղի ունեցավ Հյուսիսային համալսարանի Ուսանողական գիտական ընկերության (ՈՒԳԸ) հերթական նիստը՝ համալսարանի ուսումնահետազոտական և միջազգայնացման գծով պրոռեկտոր, բ․գ․դ․, պրոֆեսոր Լ․Ֆլջյանի ու գիտահետազոտական կենտրոնի ղեկավար և ՈՒԳԸ-ի աշխատանքների համակարգող, ի.գ.թ., դոցենտ Ավետիք Հարությունյանի մասնակցությամբ։
Նիստին ներկա էին ՈւԳԸ նախագահ Մարինե Հակոբյանը, խորհրդի անդամներ Անի Ալեքսանյանը, Գրիգոր Գևորգյանը, Պերճուհի Հայրապետյանը, Մանվել Կարապետյանը, Արմինե Մկրտչյանը և քարտուղար Լիլիթ Խեչումյանը:
Օրակարգում ընդգրկված էին հետևյալ հարցերը՝
1․ ՈՒԳԸ-ի աշխատանքային պլանով նախատեսված քայլերի իրականացում,
2․ Հայաստանի և Արցախի բուհերի ՈՒԳԸ-ների հետ համագործակցության ընդլայնմանն առնչվող հարցեր։
Առաջին հարցի առնչությամբ քննարկվեցին առաջիկայում կայանալիք գիտաժողովների, սեմինարների և դասընթացների հետ կապված հարցերի, Հյուսիսային համալսարանի ուսանողների և մագիստրանտների՝ հանրապետական և միջազգային գիտաժողովների մասնակցության ակտիվացման հարցը։ Առաջարկվեց համալսարանի հիմնադրման 25-ամյակին նվիրված ուսանողական գիտաժողովը կազմակերպել հաջորդ ուսումնական տարվա ընթացքում և քայլեր ձեռնարկել այն միջազգային դարձնելու ուղղությամբ։
Լ.Ֆլջյանը և Ա.Հարությունյանը հանդես եկան դասընթացների կազմակերպման գաղափարներով` առաջարկելով արդի թեմաներ։ Լ.Ֆլջյանի նախաձեռնությամբ առաջիկայում պլանավորվում է կազմակերպել «Ինչպե՞ս գրել գիտական աշխատանք», իսկ Ա․Հարությունյանի կողմից՝ «Երիտասարդների իրավագիտակցության մակարդակի բարձրացման հիմնական ուղիները» թեմայով դասընթացներ։
Որոշվեց կապեր հաստատել Հայաստանի և Արցախի բուհերի ՈՒԳԸ-ների հետ, փոխանակել տեղեկատվություն, փոխադարձաբար մասնակցել ուսանողական միջոցառումների՝ դրանով իսկ նպաստելով համագործակցության հաստատմանը։
Լրատվության և հասարակայնության հետ կապերի ուսումնապրակտիկ կենտրոն
