logo-ru

  СЕВЕРНЫЙ УНИВЕРСИТЕТ

magdalina

Հյուսիսային համալսարանի օտար լեզուների  ֆակուլտետի  երկրորդ կուրսի ուսանողուհի Մագդալինա Ավանեսյանն  այս կիսամյակում «Էրազմուս+»՝ մեկ ուսանողի փոխանակման ծրագրի շրջանակներում ուսումը շարունակել է Լեհաստանի Շեցինի համալսարանում: Մենք մշտապես կապ ենք պահպանել մեր ուսանողուհու հետ, հետաքրքրվել նրա ուսումնառությամբ: Իսկ այսօր Մագդալինան արդեն Հայաստանում է և պատմում է իր տպավորությունների մասին.

  • Թեպետ ուսումնառության գերակշիռ հատվածն անցկացրեցինք կարանտինի պայմաններում, այնուհանդերձ բնավ չզգացինք ձանձրույթ կամ հուսախաբություն, քանի որ բոլոր դասերը հրաշալի կազմակերպվում էին առցանց եղանակով: Ինտերակտիվ դասերի, քննությունների շնորհիվ մշտապես գտնվում էինք ակտիվ վիճակում՝ ձեռք բերելով հիմնավոր գիտելիքներ բոլոր առարկաներից: Ես գտա հոգեհարազատ ընկերների, որոնց հետ անցկացրեցի կյանքիս լավագույն օրերը: Երբեմն հավաքվում էինք փոքր խմբերով, զրուցում, երգում մեր ազգային երգերը, պարում, պատմում մեր մշակույթների մասին: Կարանտինից հետո, երբ արդեն վերադարձանք բնականոն կյանքի, սկսվեց մեր ճանապարհորդությունը Լեհաստանում։

Եղանք ամենագեղեցիկ քաղաքներում՝ Վարշավա, Գդանսկ, Կրակով, Վրոցլավ, Զակոպանիե, Կարպաչ։ Չեմ կարող նկարագրել, թե որքան գեղեցիկ էին այդ քաղաքները, խնամված, կանաչապատ։ Այցելեցինք բազմաթիվ թանգարաններ, ծանոթացանք լեհական մշակույթին և պատմությանը։ Իհարկե, սովորելու շատ բան ունենք, բայց նաև կարող ենք մեր ազգի առանձնահատկություններով էլ հպարտանալ օտար ազգերի մոտ: Անհամբեր սպասում եմ սիրելի համալսարանի, իմ այստեղի ընկերների   հետ հանդիպմանը: Փոխանցելու շատ բան ունեմ նրանց: Նաև շատ շնորհակալ եմ Հյուսիսային համալսարանի արտաքին կապերի բաժնի գլխավոր մասնագետ Անի Թամազյանին, որը այս հեռավորության վրա միշտ կողքիս էր իր խորհուրդներով ու հոգատարությամբ»:

Լրատվության և հասարակայնության հետ կապերի բաժին

varna

Բուլղարիայի Վառնայի կառավարման համալսարանի և Հյուսիսային համալսարանի միջև կնքված համագործակցության պայմանագրի համաձայն այսուհետ կիրականացվի կրկնակի դիպլոմով մագիստրոսական ծրագիր, որի ավարտին շրջանավարտները կստանան երկու որակավորում և երկու դիպլոմ՝

  1. Կառավարման մագիստրոս (Master of Management) /Հյուսիսային համալսարանի դիպլոմ և որակավորում/,
  2. Վարչարար կառավարման մագիստրոս (Master of Business Administration) /

Վառնայի կառավարման համալսարանի դիպլոմ և որակավորում/:

Այս համագործակցությունը մեծ հեռանկարներ կարող է բացել Հյուսիսային համալսարանի ուսանողների առջև, քանի որ Վառնայի կառավարման համալսարանը (ՎՈՒՄ) բավականին հեղինակավոր  միջազգային բիզնես դպրոց է, որտեղ 40-ից ավելի երկրների ուսանողներ գերազանց կրթություն են ստանում բիզնեսի և մարքեթինգի, ՏՏ, համակարգչային գիտությունների, տուրիզմի և հյուրընկալության կառավարման, ինչպես նաև գաստրոնոմիայի ոլորտում: Ուսումնառելով Վառնայի կառավարման համալսարանին՝ դուք կհամոզվեք, որ ՎՈՒՄ-ը 21-րդ դարի համալսարան է: Ունենալով բազմաբնույթ ուսանողական կառույցներ և 40-ից ավելի երկրների ուսանողներ՝ Վառնայի կառավարման համալսարանը U-Multirank- ի կողմից Կենտրոնական և Արևելյան Եվրոպայի բիզնես դպրոցների միջազգային վարկանիշային ցուցիչի համաձայն առաջին տեղն է զբաղեցնում: ՎՈՒՄ-ն իր գործունեությունը սկսել է 20 տարի առաջ որպես տուրիզմի քոլեջ և աստիճանաբար վերաճել է  հավատարմագրված համալսարանի՝ առավելապես շեշտադրում կատարելով  «Կառավարում» մասնագիտության  վրա: Այսօր ՎՈՒՄ- ը առաջարկում է բակալավրի և մագիստրոսի կրկնակի դիպլոմների ծրագրեր, որոնք ամբողջությամբ դասավանդվում են անգլերենով. ծրագրերն իրականցվում են  համագործակցելով այնպիսի երկրների համալսարանների հետ, ինչպիսիք են  Մեծ Բրիտանիան, Շվեյցարիան, Ֆրանսիան, Նորվեգիան, Նիդեռլանդները, իսկ այժմ նաև Հայաստանը՝ ի դեմս Հյուսիսային համալսարանի: Ուսումնական պլանները համահունչ են գործընկեր հաստատությունների ուսպլաններին: Ուսանողները  ստանում են 2 դիպլոմ,  ինչպես գործընկեր համալսարաններից, այնպես էլ ՎՈՒՄ-ից:

Ծրագրին դիմելու հիմնական պահաջները.

  1. Վառնայի համալսարանում սովորելու տևողությունը 1 կիսամյակ է (2-րդ կուրսի 2-րդ կիսամյակից):
  2. ՎՀ-ում սովորելու իրավունք ստանալու համար մագիստրոսն առնվազն մագիստրոսական կրթական ծրագրի 2-րդ կուրսի 1-ին կիսամյակում պետք է սովորի Հյուսիսային համալսարանում՝ «Կառավարում» մագիստրոսական ծրագրի շրջանակում( եթե տեղափոխվում է այլ բուհից):
  3. Բակալավրի բազային կրթությունը պարտադիր չէ. այլ մասնագիտությամբ բակալավրի որակավորման դեպքում ուսանողը ՎՀ-ում կուսումնասիրի լրացուցիչ դասընթացներ:
  4. Կրկնակի դիպլոմով ծրագրի շրջանակում սովորելու համար ուսանողն առնվազն պետք է ունենա /60 /2.7/ միջին որակական գնահատական:
  5. Կրթական ծրագրով սովորելու նպատակով հարկավոր է անգլերենի իմացություն IELTS 6.0 մակարդակին համապատասխան: Անգլերենի ոչ բավարար գիտելիքների դեպքում Հյուսիսային համալսարանը կանցկացնի անգլերենի լրացուցիչ դասընթացներ:
  6. Կրկնակի դիպլոմով կրթական ծրագրի տարեկան ուսման վարձը 1-ից 3-րդ կիսամյակների համար կազմում է ՝ 400000 ՀՀ դրամ, 4-րդ կիսամյակի ուսման վճարը կազմում է 400000 ՀՀ դրամ՝ Հյուսիսային համալսարանի համար և մոտ 2000 եվրո Վառնայի կառավարման համալսարանի համար:

Ուսանողները Վառնայի կառավարման համալսարանում ուսումնառության ընթացքում ստանալու են Բուլղարիայի ուսանողի կարգավիճակ, որը հնարավորություն է տալիս բոլոր ուսանողներին առանց բացառության դիմել Էրազմուս+ ուսանողների շարժունության ծրագրին՝ 6-ամսից 1 տարի տևողությամբ և ստանալ ամսական 720 եվրոյին մոտ կրթաթոշակ:

Դիմումներն ընդունվում են ս.թ. հուլիսի 1-ից օգոստոսի 28-ը: Այլ մանրամասների համար դիմորդները կարող են զանգել 010573317՝ ընդհանուր բաժին, 010554056՝ արտաքին կապերի բաժին, կամ էլեկտրոնային նամակ ուղարկել Հյուսիսային համալսարանի եվրոպական ծրագրերի պատասխանատու Անի Թամազյանին՝ Этот адрес электронной почты защищён от спам-ботов. У вас должен быть включен JavaScript для просмотра. հասցեով:

https://vum.bg/about-vum/ - ՎՀ  մասին

https://vum.bg/students-guide/-  ուսանողի ուղեցույց

https://lic.vumk.eu/en/ - ՎՀ գրադարան

heravargirq

2018 թվականին Հյուսիսային համալսարանի գիտխորհրդի երաշխավորությամբ  լույս տեսավ «Հեռավար ուսուցում» ձեռնարկը, որը, եթե անկեղծ լինենք, շատերիս համար գուցեև կիրառական քիչ նշանակություն ուներ այդ պահին: Ու թեպետ բուհում արդեն իսկ ձևավորվել էր հեռավար ուսուցման լսարանը՝ հագեցած նորագույն տեխնիկայով, իսկ երեսուն դասախոս վերապատրաստումներ էին անցել moodle ծրագրով, տնտեսագիտության ֆակուլտետն էլ միջանկյալ ու ամփոփիչ քննություններն հաջողությամբ անցկացնում էր հեռավար ուսուցման moodle համակարգով, այնուհանդերձ, ձեռնարկը արժևորելու, կիրառական նշանակությունը  գնահատելու պահը թերևս այսօր է, քանի որ արտակարգ դրությամբ պայմանավորված Հյուսիսային համալսարանը ևս կրթությունը կազմակերպում է առցանց եղանակով:  Ձեռնարկը նախատեսված է հեռավար ուսուցման համակարգում ներգրավված դերակատարների՝  կրթական հաստատությունների ղեկավարների և դասավանդողների համար, որտեղ հանգամանալից ներկայացված են հեռավար ուսուցման զարգացման միտումները, տեղական ու միջազգային փորձը, մեթոդաբանական առանձնահատկությունները, եղանակներն ու ձևերը, գործընթացի կառավարման բնութագիրը, հարթակի ձևավորման վերլուծությունը, ակադեմիական էթիկան և ազնվությունը, որակի ներքին ապահովման համակարգը և գործընթացի կանոնակարգումը: Կուզենայինք առանձնացնել և դասավանդողների ուշադրությանը ներկայացնել «Հեռավար ուսուցման մեթոդաբանական առանձնահատկությունները» բաժինը, որտեղ ներկայացված են հեռավար ուսուցման փոխներգործուն մի շարք կիրառելի մեթոդներ՝

  1. Անհատականացված դասավանդման և ուսուցման մեթոդը, որին բնորոշ են մեկ սովորողի, խորհրդակցություն ստացող ուսանողի, մեկ դասավանդողի («Մեկին մեկ» ուսուցում) փոխհարաբերությունները:
  2. Դասավանդողի կողմից ուսումնական նյութի շարադրման մեթոդը, որի դեպքում սովորողները հաղորդակցման մեջ ակտիվ դեր չեն կատարում(«Մեկը շատերին» ուսուցումը):
  3. Ուսուցման գործընթացի բոլոր մասնակիցների միջև ակտիվ հաղորդակցման մեթոդը(«Բոլորը բոլորին» ուսուցում):
  4. Նախագծերի մեթոդը ենթադրում է ուսուցման համալիր գործընթաց, ինչը սովորողին թույլ է տալիս դրսևորել ինքնուրույնություն նախագծման, պլանավորման, կազմակերպման և իր գիտաճանաչողական գործունեության վերահսկողության նկատմամբ:

Ներկայացված մեթոդների շարքը կարելի է շարունակել,  դրանցից յուրաքանչյուրի կիրառումը հեռավար ուսուցումը կդարձնի առավել հետաքրքիր ու արդյունավետ՝ սովորողներին  մղելով ինքնուրույն, հետազոտական աշխատանքների:

«Հեռավար ուսուցում» ձեռնարկը կարող է դառնալ առցանց ուսուցմամբ դասավանդողների սեղանի գիրքը:

                                                                                                                                                                     Հյուսիսային համալսարանի լրատվության և հասարակայնության հետ կապերի բաժին

Հայտարարություններ

Առցանց բաց դասախոսություն

11.07.2020
Առցանց բաց դասախոսություն

                      &n...

Հայտարարություն համալսարանի ուսանողների համար

27.06.2020
Հայտարարություն համալսարանի ուսանողների համար

Հարգելի ուսանողներ, այսուհետև ձեզ անհրաժեշտ մասնագիտական գրականության էլեկտրոնա...

Главные новости