| Адрес |
| РА, г. Ереван 0070, ул. Алека Манукяна 15а |
| Тел: (+37410) 554452, 573317 |
- Главная
- Новости
Новости
«Իրազեկ և պաշտպանված սպառող» ՀԿ նախագահ Բաբկեն Պիպոյանի հետ հանդիպումները սովորաբար նախատեսվածից կրկնակի երկար են տևում: Գիտե՞ք ինչու. որովհետև բոլորս սպառող ենք , բոլորս ցանկանում ենք լինել իրազեկ և պաշտպանված և բոլորս ամեն օր և ամենուր առնչվում ենք այն խնդիրներին, որոնց մասին բարձրաձայնում է Բաբկեն Պիպոյանը:
Հյուսիսային համալսարանի իրավաբանական կլինիկայի նախաձեռնությամբ կազմակերպված հանդիպումը «Իրազեկ և պաշտպանված սպառող» ՀԿ նախագահի հետ ևս մեկ անգամ իրազեկ և պահանջատեր լինելու , մեր սպառողական իրավունքներին ծանոթանալու, նաև՝ պարենային ապրանքի գունային մակնշման անհրաժեշտության վերաբերյալ տեղեկացված լինելու առիթ էր:
«Ինչպե՞ս կարելի է Պարույր Սևակի գերեզմանի առաջ չհավատալ հոգու անմահությանը…»:
«Պարույր Սևակն այնպիսիներից եղավ , որ պիտի ապրի այնքան ժամանակ, ինչքան ժամանակ պիտի ապրի հայ ժողովուրդը, իսկ հայ ժողովուրդը անմահներից մեկն է աշխարհում…»: - Ամենայն հայոց կաթողիկոս Վազգեն Ա
Պարույր Սևակի ծննդյան 100-ամյակին նվիրված ընթերցումները Հյուսիսային համալսարանում անցկացվեցին իբրև ղողանջ երկրպագության, ղողանջ անմահության: Յուրաքանչյուրս մեր բաժին Սևակն ունենք, ով իր տողերը ասես հյուսել է հենց մեր հոգու լարերից: Իրենց բաժին Սևակ-մարդուն, Սևակ-փիլիսոփային, Սևակ-մարգարեին , Սևակ-մանկագրին ու պոետին առանձնակի սիրով հնչեցրին Հյուսիսային համալսարանի լեզուների, գրականության և լրագրության ամբիոնի վարիչ Նունե Մկրտչյանը, Իրավագիտության ֆակուլտետի դեկան Լիանա Հակոբյանը, Հյուսիսային համալսարանի ուսանողները: Կարդացին, վերապրեցին, հուզեցին ու հուզվեցին, մի պահ Սևակի հետ բարձրացան, ինքնամաքրվեցին, բյուրեղացան:
Եվ յուրաքանչյուր անգամ, երբ որևէ առիթով «հրավիրում-ուրախանում ենք» մեր հանճարներին, զգում ենք այն մեծ պատասխանատվությունը, որ ունենք նրանց առաջ, նրանց դավանած արժեքների, պաշտած երկրի ու թողած պատգամների առաջ:
Ու ամեն անգամ նրանց տողերին մեր խոստումն ենք խառնում՝ չդավաճանել այն դավանանքին, որով արարել ու անմահացել են Նվիրյալները: Այդպես եղել է, այդպես կլինի, քանզի այդպես ԱՆՄԱՀՆԵՐՆ ԵՆ ՀՐԱՄԱՅՈՒՄ:
ՊԵՏՔ Է ԳՆԱԼ ԴԵՊԻ ՀՈՒՅՍ ԵՎ ՊԵՏՔ Է ՊԱՏՐԱՍՏ ԼԻՆԵԼ ԿՅԱՆՔԻ
«Շահբազյան» բարեգործական հիմնադրամի և Հյուսիսային համալսարանի նախաձեռնությամբ նոյեմբերի 21-ին բաց դասախոսությամբ հանդես եկավ Բեյրութի սոցիալական զգացմունքների ուսումնական կենտրոնի հիմնադիր Մերի Ղազարյան Գուրունլյանը՝ Արցախի և Լիբանանի պատերազմների ընթացքում և հետպատերազմյան շրջանում բնակչության հոգեբանական աջակցության ծրագրերի արդյունավետության վերլուծությամբ:
-Երբ կա հույս, կա նաև կյանք.այն մեզ զինում է քաջությամբ և դարձնում առավել ուժեղ, - սա է այն մոտեցումը, որով աշխատում է Մերի Ղազարյան Գուրունլյանը պատերազմի արհավիրքն ապրած ընտանիքների հետ:
Հյուսիսային համալսարանի ուսումնահետազոտական և միջազգայնացման գծով պրոռեկտոր Լուսինե Ֆլջանը նշում է, որ մեր կյանքում առկա բազմաթիվ մարտահրավերները փոքր պատերազմներ են, և մենք պետք է կարողանանք հաղթահարել դրանք՝ ապրելու դիրքերից: Կարևորելով միասնականությունը և ընդգծելով հայրենիքի հզորացման գործում Սփյուռքի մեր հայրենակիցների դերը՝ Լուսինե Ֆլջյանը շնորհակալություն է հայտնում Մերի Ղազարյան Գուրունլյանին՝ հայրենանվեր գործի և «Շահբազյան» բարեգործական հիմնադրամին՝ հետաքրքիր և բովանդակալից հանդիպման համար:
Մերի Ղազարյան Գուրունլյանի հետ հարցազրույցը՝ հաջորդիվ:
Լրատվության և հասարակայնության հետ կապերի ուսումնապրակտիկ կենտրոն
