Новости

Համալսարանի ավագ դպրոցի (

Հյուսիսային համալսարանի ավագ դպրոց և բժշկական քոլեջ

) 11-րդ դասարանի սաների՝ Հայոց մեծ եղեռնի զոհերի հիշատակին նվիրված միջոցառումը դժվար է պարզապես «դպրոցական միջոցառում» անվանել: Դա և պատմական անցյալի հիանալի իմացության դրսևորում էր, և սթափ գնահատական հայ ժողովրդի ողբերգական անցյալին ու նույնքան փոթորկոտ ու ցավոտ ներկային, նաև խրոխտ ոգու և հայրենասիրության արտահայտություն: «Ես հրաժարվում եմ ինձ պարտված ու խեղճացած տեսնել»,-հնչում է նրանց շուրթերից և հավատում ես, որ հենց այդ պատանիներն ու աղջիկներն են առաջ տանելու ազգի արժանապատվության դրոշը՝ դառնալով նոր Սողոմոն Թեհլերյաններ: Իսկ որ վրեժի ու փոխհատուցման պահը դեռ գալու է, ոչ ոք չի կասկածում...

...Նախ շնորհակալություն հայտնենք պատմության ուսուցչուհի Ն. Սիմոնյանին` այսքան ճաշակով, ասելիքով հարուստ և տպավորիչ միջոցառումը կյանքի կոչելու համար: Իսկապես մասնագիտական մեծ հմտություն է անհրաժեշտ պատմական անսպառ նյութից ընտրելու ամենակարևորն ու ազդեցիկը՝ ասելիքը տեղ հասցնելու, անցյալը վերաարժևորելու, ազգային արժանապատվությունը վառ պահելու համար: Իսկ ավագ դպրոցի սաների՝ իրենց սահմանված դերը անթերի ու լրջորեն կատարելը խոսում էր այն մասին, որ նրանք գիտակցում են ապագայում իրենց մեծ դերակատարումը՝մեր կորացած մեջքն ուղղելու և ազգի արժանապատվության դրոշը առաջ տանելու առումով:

Երգ (որը, ի դեպ, հիանալի կատարեց բժշկական քոլեջի ուսանողը), պար, ասմունք, պատմական փաստերի հմուտ համադրում ու վերարտադրում՝ ուղեկցված Սողոմոն Թեհլերյանի դատավարության մի հատվածի բեմադրությամբ: «Մենք դեռ կապացուցենք, որ մեր երակներում հոսում է Թեհլերյանի արյունը»,-երդվում են մեր սաները՝ անդրադառնալով նաև 44-օրյա պատերազմին ու հերոսացած քաջորդիների սխրանքներին: Պատմությունը մի բան է մշտապես աղաղակում՝ թուրքը մեր թշնամին է, և ոսոխին դիմառնելու համար անհրաժեշտ է զինվել ու պատրաստվել Արցախի կորուսյալ տարածքները հետ բերելուն. միջոցառման առանցքային գաղափարն էր սա:

«Թեհլերյանի օրինակով պետք է դաստիարակենք մեր սերունդներին». հնչում է ավագ դպրոցի 11-րդ դասարանի աշակերտների շուրթերից և հասկանում ես, որ նրանք արդեն իսկ մեծ հայրենասեր-վրիժառուի ոգու կրողներն են:

Հ.Գ. Միջոցառմանը նախորդեց մոմավառություն՝ ի հիշատակ 44-օրյա պատերազմում զոհված ավագ դպրոցի սաների...Ավարտին զինվորական համազգեստով փոքրիկները ասմունքեցին և ներկաներին բաժանեցին անմոռուկներ...

 

 

                                                     

 

 

Հայոց մեծ եղեռնի 106-րդ տարելիցին ընդառաջ բանասիրության և մանկավարժության ֆակուլտետի տարբեր մասնագիտությունների ու կուրսերի ուսանողների կազմակերպած միջոցառումը հայրենասիրական ոգու դրսևորման վառ օրինակ էր: «Ուսանողներն ինքնուրույն են գրել սցենարը(շնորհակալություն մասնավորապես օտար լեզվի և գրականության մասնագիտության 2-րդ կուրսի ուսանողուհի Անի Իսրայելյանին), կարճ ժամանակահատվածում փորձեր արել՝ այսօրվա բաց դասին հավուր պատշաճի ներկայանալու համար,- խոսքի մշակույթի և հաղորդակցման դասախոս Մարինե Մաճկալյանը չի թաքցնում իր հպարտությունն ու հիացմունքը,- Հայոց մեծ եղեռնի զոհերի հիշատակին նվիրված այս միջոցառումը պատմական անցյալը չմոռանալու, մեր դարավոր թշնամու իրական նկարագրին մեկ անգամ ևս անդրադառնալու և հերթական անգամ չսխավելու ուսանողների ձգտումն է արտացոլում»:

Ինքնատիպ սցենարը՝ ժողովրդի և պատմության միջև ընթացող երկխոսությամբ, ներկաներին տարավ հայ ժողովրդի ողբերգական անցյալ՝ սուլթան Համիդի ջարդեր, ֆիդայական պայքար և ողբերգական 1915 թվական...

Բաց դասի ընթացքում անդրադարձ արվեց նաև 44-օրյա պատերազմին, մեր հերոսացած տղաներին՝ նրանց հիշատակը վառ պահելու երդմամբ:

Դասն ուղեկցվում էր սահիկահանդեսով, իսկ Ազնավուրի անկրկնելի կատարումը մի անբացատրելի շիկացած ու հուզական մթնոլորտ էր ստեղծել լսարանում:

Դասի մասնակիցները՝ բանասիրության և մանկավարժության ֆակուլտետի դեկան Մ. Այվազյանը, լեզուների, գրականության և լրագրության ամբիոնի վարիչ Ն. Մկրտչյանը, հոգեբանության դասախոս Մ. Մամիկոնյանը, հիացմունքով խոսեցին դասի մասին, նշեցին նաև մեթոդական առումով դրա ճիշտ կազմակերպված լինելը, դասի բնույթով պայմանավորված շնչառական վարժությունների կարևորությունը, իրենց շնորհակալությունը հայտնեցին դասախոս Մ. Մաճկալյանին և ուսանողներին՝ հետաքրքիր և ուսանելի դասի համար:

 

 

 

 

                                     

 

 

Անհնար է գրել «լուր» ժանրով, երբ փաստից առավել հիանալի տպավորություններ ու զգացողություններ են: Մասնագիտական կողմնորոշման նպատակով Արմավիրի մարզի դպրոցներ
(

Նորավանի միջնակարգ դպրոց 

Հ. Ավետիսյանի անվ. դպրոց, Խանջյանի Միջնակարգ դպրոց,

Բամբակաշատի միջնակարգ դպրոց

կատարած այցելությունները ոչ միայն հնարավորություն տվեցին սերտացնել-բուհ-դպրոց կապը, այլև ձեռք բերել նոր ու հետաքրքիր ընկերներ ինչպես աշակերտների, այնպես էլ տնօրենների և ուսուցիչների շրջանում:

Երկու օրվա ընթացքում եղանք տասը դպրոցներում՝ Վաղարշապատի Նարեկացու անվան ավագ դպրոցում, Արմավիր քաղաքի հմ.1 և հմ.4 ավագ դպրոցներում, ինչպես նաև Խանջյան, Լուկաշին, Նորավան, Բամբակաշատ, Մյասնիկյան, Լեռնագոգ, Դալարիկ համայնքների դպրոցներում: Առաջին բանը, որն անմիջապես գրավում էր մեր ուշադրությունը դպրոցներ ոտք դնելիս, ծայրաստիճան մաքրությունն էր, կոկիկությունն ու կարգապահությունը: Խոսքը միայն համավարակի թելադրանքով նախատեսված միջոցառումները չէին՝ դիմակը՝ պարտադիր, ախտահանիչ նյութերը՝ ամենուր, սոցիալական հեռավորությունն էլ՝ արդեն ընդունված հաղորդակցման ձև: Մի ընդօրինակելի կարգ ու կանոն կար, որի համապատկերին առավել հստակ էր դրսևորվում ազգայինն ու ավանդականը պահել-պահպանելու դպրոցների ձգտումը: Իսկ մեր օրերում սա, թերևս, դաստիարակության ամենակարևոր կողմն է, որին անխտիր հետամուտ էին վերոնշյալ դպրոցներում: Իսկ տնօրեններից ստացած տպավորություններն առանձին թեմա է: Միայն կասենք՝ նշյալ դպրոցներում մատաղ սերնդի կրթության կազմակերպման ու դաստիարակության գործը հուսալի ձեռքերում է:

…Զրուցեցինք աշակերտների հետ, ներկայացրինք Հյուսիսային համալսարանում առկա մասնագիտությունները, դիմորդներին և ուսանողներին տրվող արտոնությունները: Պատասխանեցինք դիմորդների՝ մեզ առավել հաճախ տրվող հարցերին՝ արդյո՞ք պետական դիպլոմ է տրամադրում բուհը, հնարավո՞ր է աշխատանքի անցնել համալսարանի տրամադրած դիպլոմով, պահանջարկ վայելո՞ւմ են համալսարանի շրջանավարտները աշխատաշուկայում, բուհի մասնագիտական կրթական ծրագրերն արդյո՞ք համապատասխանում են ժամանակի պահանջներին և ապահովո՞ւմ են համապատասխան կրթական վերջնարդյունքներ:

Բոլոր հարցերի պատասխանները, բնականաբար, այո էին: Պայմանավորվածություն ձեռք բերվեց համալսարանի և դպրոցների համագործակցության առավել սերտացման վերաբերյալ: Առաջիկայում բուհում կկազմակերպվեն բաց դասեր, որոնց կմասնակցեն մեր գործընկեր դպրոցների բարձր դասարանների աշակերտները:

Շնորհակալություն ենք հայտնում նաև աշխատանքային խմբի անդամներին՝ համալսարանի որակի ապահովման վարչության աշխատակիցներ Սուսաննա Ավագյանին, Հովհաննես Հարությունյանին, բուհի գործերի կառավարիչ Էդիկ Եղոյանին, լրատվության բաժնի ղեկավար Գ. Հակոբյանին, ուսանողներ Պողոս Ստամբուլյանին, Ս. Հովսեփյանին, Անահիտ Ալեքսանյանին և բուհի ղեկավարությանը՝ մարզեր կատարած այցելությունների ընթացքում դրսևորած աջակցության համար:

Նշենք նաև, որ նշյալ այցելությունները համալսարանի երկու ստորաբաժանումների՝ լրատվության և հասարակայնության հետ կապերի ուսումնապրակտիկ կենտրոնի ու որակի ապահովման վարչության և ուսխորհրդի հետ համագործակցության հիանալի օրինակ է: